Jer 17 | NdeIBE | STEP | “Isono sikaJuda sidwetshwe ngensimbi, sabhalwa ngomcijo welitshe lomlilo, ezicecedwini zezinhliziyo zabo lasezimpondweni zama-alithare abo.

Jeremiah 17

1 “Isono sikaJuda sidwetshwe ngensimbi, sabhalwa ngomcijo welitshe lomlilo, ezicecedwini zezinhliziyo zabo lasezimpondweni zama-alithare abo.

2 Labantwababo bayawakhumbula ama-alithare abo lezinsuku zika-Ashera phansi kwezihlahla eziluhlaza laphezu kwamaqaqa aphakemeyo.

3 Intaba yami eselizweni lenotho yenu kanye lemfuyo yenu yonke ngizakunikela kube yimpango, ndawonye lezindawo zenu eziphakemeyo, ngenxa yokona kulo lonke ilizwe lenu.

4 Ngenxa yezici zenu lizalahlekelwa yilifa engalinika lona. Ngizalenza libe yizigqili zezitha zenu elizweni elingalaziyo, ngoba livuse ulaka lwami, njalo luzavutha kuze kube nininini.”

5 UJehova uthi: “Uqalekisiwe lowo othemba umuntu, othembe ukuthi amandla akhe asenyameni, onhliziyo yakhe ihlamukela uJehova.

6 Uzakuba njengesihlahlanyana enkangala; ukuphumelela kayikukubona ekufikeni kwakho. Uzahlala ezindaweni ezomileyo enkangala, elizweni letshwayi elingahlali muntu.

7 “Kodwa ubusisiwe umuntu othemba uJehova, othemba lakhe likuye.

8 Uzakuba njengesihlahla esihlanyelwe eduze lamanzi esinabisela izimpande zaso esifuleni. Kasesabi lapho ukutshisa kufika; kasikhathazeki ngomnyaka wokoma; kasiphuthi ukuthela izithelo.”

9 Inhliziyo iyakhohlisa okudlula izinto zonke njalo imbi kakhulu. Ngubani ongayizwisisa na?

10 “Mina Jehova ngiyayihlola inhliziyo ngihlole lengqondo, ukuba umuntu ngimnike okufanele ukwenza kwakhe mayelana lalokho okufanele izenzo zakhe.”

11 Umuntu ozuza inotho ngezindlela ezimbi unjengesikhwehle esichamusela amaqanda esingawaqandelanga. Lapho ingxenye yokuphila kwakhe isidlule, izaphela, kuthi ekucineni abonakale eyisithutha.

12 Isihlalo sobukhosi, esikhazimulayo esaphakanyiswayo kusukela ekuqaleni, siyindawo yethu yokuphephela.

13 Awu Jehova, themba lika-Israyeli, bonke abakudelayo bazayangiswa. Labo abakuhlamukelayo bazabhalwa othulini ngoba bedele uJehova, umthombo wamanzi okuphila.

14 Ngisilisa, Jehova, njalo ngizasiliswa; ungikhulule, ngizakhululeka, ngoba nguwe engimdumisayo.

15 Bahlala besithi kimi, “Lingaphi ilizwi likaJehova na? Kaligcwaliseke khathesi!”

16 Angibalekanga ekubeni ngumelusi wenu; liyakwazi ukuthi angilufisanga usuku lokuphela ithemba. Okudlula endebeni zami kusobala kini.

17 Ungabi ngowesabekayo kimi; uyisiphephelo sami ngosuku lokuhlupheka.

18 Abangihluphayo kabayangiswe, kodwa mina ungivikele ehlazweni; kababe lokwesaba, kodwa mina ungivikele ekwesabeni. Balethele usuku lobubi. Ubabhubhise ngokuqothula okuphindiweyo.

Ukugcina ISabatha Lingcwele

19 UJehova wathi kimi: “Hamba uyekuma esangweni labantu, amakhosi akoJuda angena ngalo njalo aphume ngalo; ume futhi lakuwo wonke amanye amasango aseJerusalema.

20 Uthi kubo, ‘Zwanini ilizwi likaJehova, lina makhosi akoJuda labo bonke abantu abahlala koJuda kanye labantu bonke abahlala eJerusalema abangena ngala amasango.

21 UJehova uthi: Qaphelani lingathwali mthwalo ngosuku lweSabatha loba liwungenise ngamasango aseJerusalema. 22 Lingaphumisi mthwalo ezindlini zenu kumbe lenze loba yiwuphi umsebenzi ngosuku lweSabatha, kodwa ligcine iSabatha lingcwele, njengokulaya kwami okhokho benu. 23 Kodwa kabalalelanga loba banake; izintamo zabo zazilukhuni njalo kabalalelanga kumbe bamukele ukulaywa.

24 UJehova uthi: Kodwa uma liqaphele ukungilalela, lingangenisi mthwalo ngamasango edolobho leli ngeSabatha, kodwa ligcina usuku lweSabatha lungcwele ngokungenzi msebenzi ngalo, 25 lapho-ke amakhosi ahlezi esihlalweni sobukhosi sikaDavida azangena lezikhulu zawo ngamasango edolobho leli. Wona lezikhulu zawo bazafika begade izinqola zempi lamabhiza, belabantu bakoJuda lalabo abahlala eJerusalema; bahlale kulo idolobho kuze kube nininini. 26 Abantu bazakuza bevela emadolobheni akoJuda lasemizini egqagqele iJerusalema, bevela elizweni lakoBhenjamini lasezintatshaneni zangasentshonalanga, bevela elizweni lamaqaqa laseNegebi, beletha iminikelo yokutshiswa lemihlatshelo, iminikelo yamabele, impepha kanye leminikelo yokubonga endlini kaJehova. 27 Kodwa uma lingangilaleli ekuthini ligcine usuku lweSabatha lungcwele ngokungathwali mthwalo lapho lingena ngamasango aseJerusalema ngosuku lweSabatha, lapho-ke ngizaphemba umlilo ongacitshekiyo emasangweni eJerusalema ozaqothula izinqaba zalo.’ ”